Денеска, министерот без ресор задолжен за интеграција и имплементација на Стратегијата за инклузија на Ромите 2022–2030, Ерџан Демир, заедно со претседателот на Владата на Република Северна Македонија, Христијан Мицкоски, и министерот за социјална политика, демографија и млади, Ѓоко Велковски, присуствуваше на свеченото пуштање во употреба на новите занимални во детската градинка „8 Април“ во Општина Шуто Оризари.
Ставањето во функција на новите занимални претставува значаен чекор кон унапредување на условите за згрижување и воспитување на најмладите жители на општината, како и кон создавање поголеми можности за нивен правилен раст, развој, социјализација и вклучување во предучилишното образование.
Со отворањето на новите простории, градинката „8 Април“ добива дополнителни капацитети за згрижување на децата, а со тоа се создаваат подобри услови за поддршка на семејствата и за полесно усогласување на семејните и работните обврски на родителите. За децата, пак, ова значи можност да растат во средина во која ќе имаат пристап до игра, учење, дружење и активности соодветни на нивната возраст, под грижа на стручен и посветен кадар.
Посебно значење на овој проект има фактот што новите простории се наменети за децата од Шуто Оризари, општина во која достапноста на предучилишното образование е од особена важност за семејствата и за најмладите генерации. Инвестирањето во детските градинки не значи само изградба и уредување на објекти, туку и создавање услови секое дете да добие можност за рано учење, развој на социјалните вештини и подготовка за понатамошно образование.
Во таа насока, Владата најави дека во најкраток можен рок ќе даде согласност за вработување на потребниот кадар, со цел новите капацитети да бидат целосно ставени во функција. Обезбедувањето соодветен стручен кадар е неопходен предуслов за квалитетно згрижување на децата и за непречено функционирање на градинката.
Со ставањето во функција на дополнителните занимални се очекува значително да се подобри достапноста на услугите за предучилишно згрижување во Општина Шуто Оризари, со цел да се одговори на потребите на родителите и да се овозможи децата да добијат соодветна грижа и воспитно-образовна поддршка во текот на денот.
Министерот Ерџан Демир ја истакна важноста од континуирано вложување во образованието, грижата и развојот на децата, нагласувајќи дека еднаквите можности треба да започнат уште од најраната возраст. Пристапот до квалитетно предучилишно образование е важен дел од процесот на социјална инклузија и создавање општество во кое секое дете ќе има можност да ги развива своите способности и потенцијали, без оглед на неговото потекло или социјалните услови во кои расте.
Во контекст на спроведувањето на Стратегијата за инклузија на Ромите 2022–2030, проширувањето на пристапот до предучилишно образование има особено значење за ромските деца и нивните семејства. Раното вклучување во образовниот процес придонесува за развој на јазичните, комуникациските и социјалните вештини, поттикнува дружење меѓу децата и создава подобра основа за нивно понатамошно образование.
Истовремено, достапните и функционални детски градинки им овозможуваат на родителите полесно да ги организираат своите секојдневни обврски, да се вклучат на пазарот на трудот и да имаат поголема сигурност дека нивните деца се згрижени во соодветни услови. Затоа, ваквите проекти имаат пошироко општествено значење и претставуваат инвестиција не само во децата, туку и во благосостојбата на семејствата и во развојот на локалната заедница.
Министерот Демир упати благодарност до амбасадорите на Кралството Норвешка и на Швајцарската Конфедерација за нивната поддршка и придонес во реализацијата на овој проект. Благодарност беше упатена и до Општина Шуто Оризари, градоначалникот, членовите на Советот на општината и советниците, како и до сите институции и претставници на Владата кои придонесоа овој проект да стане реалност.
Реализацијата на ваквите иницијативи ја потврдува важноста од партнерството меѓу централната и локалната власт, меѓународните партнери и сите чинители кои работат на подобрување на условите за живот на граѓаните. Преку заедничка посветеност, планирање и конкретни активности, се создаваат можности за подобри услуги, поголема социјална вклученост и поквалитетни услови за раст и развој на децата.
Грижата за децата започнува од најраната возраст. Затоа, вложувањето во детските градинки, проширувањето на капацитетите и обезбедувањето стручен кадар се важни чекори кон општество во кое секое дете ќе има можност за среќно детство, квалитетна грижа и подобра иднина.
Кабинетот на министерот без ресор задолжен за интеграција и имплементација на Стратегијата за инклузија на Ромите 2022–2030 и понатаму ќе продолжи да ги поддржува иницијативите насочени кон унапредување на условите за живот на ромската заедница, со посебен акцент на децата, образованието, еднаквите можности и целосната социјална инклузија.
