Денес, министерот без ресор задолжен за интеграција и имплементација на Стратегијата за инклузија на Ромите 2022–2030, Ерџан Демир, оствари средба со амбасадорот на Република Полска во Република Северна Македонија, Неговата Екселенција Мариуш Бримора (Mariusz Brymora).
На средбата се разговараше за положбата на ромската заедница во Република Северна Македонија, актуелните предизвици со кои се соочуваат Ромите, како и за потребата од континуирани активности и координиран пристап за унапредување на нивната општествена положба. Во фокусот на разговорот беа можностите за подобрување на условите за живот на ромската заедница, зголемување на нејзиното учество во општествените процеси и создавање еднакви можности за сите граѓани.
Посебно внимание беше посветено на значењето на образованието како една од клучните области за долгорочна инклузија на Ромите. Квалитетното и достапно образование, поддршката на децата и младите, како и создавањето услови за нивно успешно продолжување на образовниот процес се важни предуслови за подобри перспективи и поголеми можности во иднина. Во таа насока, беше нагласена потребата од посветеност на институциите и соработка со сите релевантни чинители за надминување на пречките со кои се соочуваат ромските ученици и нивните семејства.
Посебен акцент беше ставен и на дигиталната писменост кај ромската заедница, како важен предуслов за подобрување на пристапот до образование, информации и можности за вработување. Во услови на забрзана дигитализација на општеството, стекнувањето дигитални вештини е од особено значење за децата, младите и возрасните Роми, со цел полесно да ги користат современите технологии и електронските услуги. Во таа насока, беше истакната потребата од создавање можности за унапредување на дигиталните компетенции, намалување на дигиталниот јаз и обезбедување еднаков пристап до современите технологии. Развојот на дигиталната писменост претставува значаен чекор кон поголема инклузија, самостојност и активно учество на Ромите во современото општество.
Во рамки на разговорот беа опфатени и прашањата поврзани со вработувањето, социјалната заштита, домувањето и пристапот до јавните услуги. Овие области имаат значајна улога во подобрувањето на квалитетот на живот и во обезбедувањето услови за поголема економска и социјална сигурност на ромската заедница. Истовремено, беше истакната важноста од намалување на нееднаквоста, спречување на дискриминацијата и обезбедување еднаков пристап до можностите и услугите што им стојат на располагање на сите граѓани.
Министерот Ерџан Демир ја истакна важноста на системскиот пристап во унапредувањето на инклузијата на Ромите, при што посебно значење имаат соработката меѓу институциите, утврдувањето на приоритетите и преземањето активности насочени кон реалните потреби на заедницата. Воедно, спроведувањето на мерките предвидени со Стратегијата за инклузија на Ромите 2022–2030 претставува значаен дел од напорите за подобрување на состојбите во клучните општествени области и за создавање поеднакви услови за сите.
На средбата беше истакната и важноста на меѓународната соработка како можност за размена на искуства, знаења и добри практики во областа на инклузијата. Соработката со дипломатските претставништва и меѓународните партнери може да придонесе кон отворање нови можности за поддршка на иницијативи, унапредување на институционалните капацитети и развивање пристапи што ќе одговорат на потребите на ромската заедница.
Министерот Ерџан Демир нагласи дека унапредувањето на положбата на Ромите бара континуирана посветеност, институционална одговорност и активно вклучување на сите релевантни општествени чинители. Особено е важно активностите да бидат насочени кон конкретни резултати, со цел секој припадник на ромската заедница да има еднаков пристап до образованието, можностите за вработување, здравствената и социјалната заштита, како и до останатите услуги и права.
Средбата со амбасадорот на Република Полска, Мариуш Бримора, претставува можност за продлабочување на дијалогот за прашања од значење за ромската заедница и за размена на мислења во однос на можностите за унапредување на нејзината положба. Продолжувањето на комуникацијата и градењето партнерства со меѓународните претставници се важни за поттикнување на заеднички напори кон општество во кое еднаквоста, инклузијата и почитувањето на правата ќе бидат достапни за сите граѓани.
