Денес, министерот, задолжен за интеграција и имплементација на Стратегијата за инклузија на Ромите 2022–2030, Ерџан Демир, оствари посета на Дневниот центар „Гнездо“, каде што имаше можност непосредно да се запознае со работата на центарот, активностите што се реализираат и предизвиците со кои се соочуваат децата Роми во образовниот процес.
Во рамки на посетата се разговараше за потребите на децата Роми, особено во делот на образованието, нивната вклученост во образовниот систем, како и за пречките со кои се соочуваат во остварувањето на своето право на квалитетно и достапно образование. Посебно внимание беше посветено на значењето на континуираната поддршка на децата, создавањето еднакви можности за учење и развој, како и потребата од навремено препознавање и надминување на предизвиците што можат да влијаат врз нивниот образовен напредок.
Дневните центри имаат значајна улога во обезбедувањето поддршка на децата и нивните семејства, преку активности што придонесуваат за нивниот образовен, социјален и личен развој. Преку непосредна работа со децата, ваквите центри придонесуваат за зајакнување на нивните способности, поттикнување на интересот за учење и создавање услови за нивно поактивно учество во заедницата.
За време на разговорот беше истакната и важноста на соработката меѓу институциите, организациите и сите чинители кои работат на унапредување на положбата на децата Роми. Заедничкиот пристап, размената на искуства и подоброто разбирање на потребите на децата се значајни предуслови за изнаоѓање соодветни решенија и преземање конкретни активности за подобрување на нивниот пристап до образование.
Министерот Ерџан Демир ја нагласи важноста на континуираната посветеност кон унапредување на образовната инклузија на децата Роми, со цел секое дете да има можност да го развива својот потенцијал, да напредува и активно да учествува во општеството. Инвестирањето во образованието и поддршката на децата претставуваат важен чекор кон создавање поправедно општество, во кое сите деца ќе имаат еднакви можности за успех, без разлика на нивното потекло или социјалниот статус.
Посетата на Дневниот центар „Гнездо“ претставува можност за непосредно запознавање со состојбите на терен и потребите на децата, кои се важни при креирањето и унапредувањето на мерките и активностите насочени кон подобрување на образовната инклузија и целокупната положба на ромската заедница.
